by Arnold Wong
仲記得宣佈8月5號會有一班西班牙同門來交流時，齋睇個名，我心裡面係無預到會用seminar形式的，因為出面一般嘅seminar，都係好少會幾家拳會一齊做，亦會比較商業化。 所以真係有點意外。。。。
喺昨天嘅交流會，各黃系拳會亦無私咁分享自己嘅技術，非常難得，雖然大家在地理上分隔了半個地球，拳術亦各自發展了數十年，手法各有不同，但拳理上明顯係一致的，所以大家普遍上試幾下手就已經大概掌握到各自拳會示範嘅技巧，點解嘅？因為我哋練緊嘅，係黃淳樑詠春拳。我哋有拳理，有原則，就算去都邊，變成另一個樣，原則係唔會變。
今次西班牙交流會時間亦很緊湊，兩個多小時非常充實。可能大家知道時間有限，所以都非常非常投入，氣氛很好。人數亦剛剛好，再多啲就會開始亂，亦會有太多人企得太遠聽唔到。跟住搞搞下就會變咗分返開自己group, 無咗交流嘅意義。
搞大型seminar其實較難去針對每位同門嘅技術水平，亦有一些同門未達到黐手水平。但我見到嘅係，大家無分彼此，互相指點，互相幫助。同西班牙同門嘅溝通，唔係西班牙文，唔係英文，而係詠春嘅語言。在大家搭手嘅一瞬間，大家嘅距離立刻拉近了。我有同幾位西班牙嘅同門交流，令我最深刻的，唔單只係佢地嘅技術，而係佢哋係擺個心去同我哋練習。大家曉黐手過手嘅就應該會有同感，我地同對手搭手無耐，對方嘅行為性格就大致可以感受到。而我從西班牙同門過手嘅過程，不論程度高低，都沒有感受對方有任何想比試，要贏嘅想法。相比其他外邊嘅所謂詠春交流會，你打我一下，我鬥快搏返你兩拳，香港外面嘅詠春門人真係要向人地學習下。固步自封，又點可以學人講宏揚詠春拳呢。
另外，今次再次有機會同香港另外兩大黃系詠春拳會聚會，感覺更親切，見到幾位師伯師叔，同一眾師兄師姐，真係有一家人嘅感覺，好比好多親戚聚會，見面只為「親戚」兩個字，來得更真誠。
所以最後一定要多謝師父同PVT，唔單只盡心盡力教我哋，仲比咁多機會我地去見識，同加入呢個大家庭，等我哋有機會「見自己」，「見天地」。
我相信冇返來嘅同學同門，係吾會諗到昨晚既聚會係可以有咁嘅規模咁嘅氣氛，因為我自己亦無預到。
你哋冇來就真係走寶啦!!